Posted on Sun, September 16, 2018

Khrih cu vawlei ah A Pa rian a tuan lio ah, khuaruahhar tampi a tuah.  Mi tampi a dam ter hna.  Sibawi te nih damh khawh lo mi thinghmui ngei zong a damh hna [Matthai 8:1].  Khuachia khuavang nih a tuahmi hna a damter hna.  A thil ti khawhnak thawng an theih tikah Khrih cu mi tampi nih an zulh.  Zanlei sang ah Khrih nih a zultu hna cu rili khattelei ral ahkhin va kal usih a ti hna.  Lawng chung ah an lut.  Cun thlichia cu a hrang ciammam i tilet cu an lawng chung ah a lut cuahmah ko, an lawng cu ti a khat dengmang [Matthai 8:23; Marka 4:15]. 

Zultu hna cu an thin a phang tuk.  Khrih cu an hlam.  Khrih cu lawng hnu lei ah a um i, chantling cungah aa hngilh.  A zultu hna nih khan an va hlauh.  “Saya, kan thih dengmang tung, zei poi lo in maw na um ko! an va ti.”  A tho i Khrih nih thlitu cu hrang ti hlah tiah nawl a pek.  Thlichia le tilet cu an dai.  Zultu hna nih “Thlichia le tilet hmanh nih dah ngai a bia an ngaih ko hi! an ti.

Hi Bible caang ka rel paoh ah Lairam kan um lio i ka hmet lio ah ka pa he lo kan riah i totho a hrangmi ka thei tawn.  Khuacan a hman lio ahcun Lairam ah April le May thla chung ah totho hi voi kua a hrang.  Elementary sianginn ka kai lio a si i thal sianginn khar he aa tong i lo kalnak ah ka pa ka rak zul.  Zan lei fate totho a hrang tawn.  Kan thlam fate cu choih dih a zalh.  Thlam khar cu a chung in kan tlaih, ruah nih cin dihlak in a kan surh.  Thin a phan khawh ning cu tihnung tuk a si.  

Hi bantuk thlichia hi Khrih nih a daihter mi a si.  An i citmi cu tilawng a si, tung a ngei lo, an hrenmi a si lo, ai hnin tuk, an lawng chung ah ti a lut cuahmah fawn.  A zultu hna cu thinphang tuk in an um.  Khrih nih nawl a pek i thlichia cu a dai.   A zultu hna cu hnangam tein an um kho than.

Thlichia cu a phunphun a um.  Rilipi ah a hrang mi hurricane le tlang ah a hrangmi tornado cu tih a nung tuk.  USA ah Oklahoma State cu tornado tamnak a si caah a rawk can a tam.  Laimi tampi nih um ding an duh tuk lo.  Mi tlawm te an um.  Teddim cu tampi an um.  Hi thlichia nih inn lo a rawk hlei ah minung nunnak tiang tampi a lak tawn.

Hi vawlei ah a cangmi thlichia si lo in, minung kan nunnak ah Sehtan thlichia hi a tam tuk.  A thawng tuk.  Minung nunnak tampi a lak tawn ve hna.  Thinlung phurhrit a kan pek. Lungretheihnak a kan pek.  Lungdonhnak a chuah ter.  A caan ahcun hmun tampi ah Khrih he kan i citmi kan tilawng pi a simi “khrihfabu” hmanh hi a hninh tawn.  Hi bantuk thlichia hrang lak ah um cu mi tampi nih an tih tawn.  Awlokchawng in an um tawn.  

Hi thlichia cu zumtu hna kan chung in Sehtan nih a chuahter mi a si.  Ahohmanh nih Sehtan hmanmi zumtu si cu kan duh lo.  Nain, kan i hngalh lo in a kan hman sual tawn.  Hi bantuk Sehtan thlichia le tilet hi daihternak ding ah a dang a um lo.  Thlichia le tilet nih a nawl an ngaihmi Khirh lawng hi a daihter kho tu a si.  Thinlung in kan dam lo tikah thinghmui hma a damter khotu le khuachia riantuannak vialte a hrawk kho tu Khrih hi kan herh.  Kan sawm ahcun Khrih nih damnak a kan pek.  Kan phurrit vialte a zaang.  Lawmhnak le daihnak hrampi a simi Khrih cu kan thinlung chung ah thlizil bantuk in a hrang. Kik zirziar in kan um.  Kan tha a kan hrimh ter.  Kan damnak Khrih hi hngalh fian ahcun thangthat lo awk a tha lo.  Kan i lawmhnak Khrih a si.  Pathian nih thluachuah kan pe ko seh!  Amen.

Sehtan Hriamnam ‘Tihnak (Fear)’

Tihnak hi Sehtan hriamnam tha bik a si.  “Na tuah kho lai lo, ka tuah kho lai lo” timi thinlung kan ngeih ahcun kan chung ah Satan nih rian a tuannak a si.  Satan nih minung hi thinphang le thlalau in a kan tuah. Kan thin hna a kan hunter. Siarem lo in a kan tuah tawn.  Pathian bochannak thinlung kan ngeih lo ahcun Sehtan nih a kan tei taktak ko lai.  Hi tihphannak cu zumtu paoh nih kan tonmi a si.  A tha lei in si lo in, a chia lei in kan thinlung nih a ruahmi paoh cu Pathian sin in a ra mi a si lo. Pathian nih a chia le a tha hngalh/thleidan khawhnak thinlung a kan pek.  Bawipa Pathian hmai ah ‘thinlung thiang [pure heart]’ te in kan hman khawh ahcun Bawipa aa lawm.

Siangpahrang David zong thinphang in a rak um ve.  “Zei can dah na ka philh lai, maw Bawipa?  Na ka philh zungzal ko lai maw?  Zei can dah fahnak hi ka in lai?  Zei can dah ngaihchiatnak in ka lung hi chun he zan he a khah lai? Zei can dah ka ral hi a lek in an i lek lai? [Salm 13:1-2] a rak ti ve. 

Zumtu hna hi Sehtan nih hman khawh mi kan si sual lo ding hi ralrin ngai kan hau dih. Kan i hngalh lo in, Sehtan hi a rian tuan piak sual a awl ngai.  Mi dang kha thazaang pe lo in tih phannak in umter sual khawh a awl te.  Thanuam lo in kan tuah khawh hna.  Sehtan nih a kan hman ahcun kanmah lila kha thanuam lo in kan um kho.  Zumtu pakhat khat nih Khrih zumhnak/bochannak in a nunnak ah Pathian thawnnak a langh tikah kanmah nih thanuam lo nak a phunphun in kan tuar kho.  Cu caah, zumtu dihlak nih hi Sehtan pa riantuannak cu kan doh ti a hau zungzal.  

Pathian thawnnak cu a ngan tuk.  Cathiang nih

  • “A zummi hna chung i rian a tuantu a thawnnak cu zeitluk in dah a ngan ti kha nan hngalh khawh nak hnga caah a ceunak cu nan hmuh khawh nak hnga, nan lung kha in hun piak ko hna seh. Hi kan chung i a ummi thawnnak hi thihnak in Khrih a thawhtertu le vancung khua i Pathian orhlei kam ah a thuttertu Pathian thawnnak he khan aa khat mi a si.” [Efesa 1:19-20] tiin a kan cawnpiak.
  • “Amah nih an zohkhenh hna caah nan lungretheihnak vialte cu Amah cungah khan chia dih ko u” [1 Peter 5:7] a kan ti.
  • “A autu vialte hna cu an pawng khin an um hnawh hna, lungtak in a autu vialte hna cu.  Amah a tihmi paoh cu an herhmi vialte kha a pek hna i, an auhnak kha a theih i a khamh hna. Amah a dawtu cu an dihlak in a huhphenh hna, sihmanhsehlaw mi tha lo cu a hrawh dih hna lai” [Salm 145:18-20] a ti.  

A lianngan i a thawngmi kan Pathian bochan in kan nunnak a temtawn zungzal tu tihphannak [fear] hi tlau dih ko seh! Pathian nih a kan umpi zungzal ti hi philh hlah usih.  

Other Sermons
  • Dawtu Pa Thinlung

    September 16, 2018

    Fapa hniang nih “Ka pa, ka co hnga ding ro cu ka pe ko” tiah a hal. A upa he ro cu a cheuh hna. Fapa hniang nih a co hnga ding ro cu a ngeih dih. Ram dang ah khual tlawn aa thawh.