Posted on Sat, September 15, 2018

Bible relnak:  Vawlei car i a keu mi thingkung bantuk in a sal cu a tthang, cu cu Bawipa duhning a rak si.  Zoh kan duhnak hnga ding ah i dawhnak le rumra zeihmanh a ngei lo. Iang zeihmanh a ngei lo i a pumrua zong a chuakthiammi a si lo (Isaih 53:2).

Biahmai tthi

Texas sizung ah Spanish nu cu dawhte in aa thuam.  Housekeeping a ttuan.  Nurse he tahchunh tikah a muisam aa dawh deuh. Nain, thiamnak a ngeih lo caah a rianttuanmi cu aa dawh lo.  Ka thinlung ah a chuak hmasa mi cu ramdang ah kan um tikah kan za ngai, kan i dawh ngai ve hna nain, thiamnak kan ngeih lo caah kan rianttuanmi cu a har; rian dawh lo deuh zong a si ko lai.  Nain, hi ka ram ah a phanmi nih caanttha kan ngeih mi hi hman thiam kan hau.  Kan sining zong hi kan hngalh lo ruang ah kan i palh khawh mi a tam ngai.  

Thahchunhnak: Kan ram sining in le kan i capo tawn ning le kan thinhun tawn ning in hun ding a si ti lo.  Phung nih a kan uk cang.  Phung nih a duh lo mi tuah sual ahcun ngaihthiamnak a um kho lo.

Cu nu kong ka theih hnu ah ka ruah tthan mi cu Khrih dawhnak a si.  Kawlram ah High School kan kai lio ah kan cawnmi cu Kawlholh in “Ahlah ku si” ti mi a si. Mi kip nih dawhnak kan ngeihnak a si.  Paul nih dawhnak kong a chim tikah “Van pum le vawlei pum an um.  Van pum hna nih dawhnak phunkhat an ngei i vawlei pum hna nih dawhnak phun dang an ngei ve.  Ni nih amah dawhnak te a ngei i thlapa zong nih amah dawhnak te a ngei ve; cun arfi nih khin dawhnak dang tete an ngei i arfi lak hmanh ahcun dawhnak a phunphun an um” (I Korin 15:40-41) a ti.

Dawhnak (Beauty): Dawhnak cu minung le hmun le thilri hna nih kan ngei.   Minung in kan chim ahcun aa dawhtu nih kaa dawh tiah aa hmuhmi kha midang kan thinlung ah aa dawh tiin kan hmuh lo; kan lung a tlin ve lo ahcun dawhnak a tling lo.  Cu caah, dawhnak hi pakhat ta long si lo in, midang he i hrawmmi thil a si.  

Philosopher Immanuel Kant:  Dawhnak nih subjective and objective qualities a ngei tiah a ti.   Chim duhmi cu lenglei dawhnak le chunglei dawhnak a si.  Dawhnak cu mah ca lawng ah si lo in, mi tampi caah khiah mi a si a ti.  

Lenglei dawhnak:  Zeitluk in dah a tivun nonal, ngandam, le pumrua le tungtai tthat tiin an lang.

Chunglei dawhnak: Minung sinak (personality), fimnak (intelligence), velngeihnak (grace), duhnunnak (charm) le rumra (elegance) ngei ti mi hna khi an si.  Chunglei dawhnak nih hin lenglei in dawhnak a ngei lo mi zong kha duh a nun ter.  Hi hi Pathian laksawng a si kan ti lai.

Pathian dawhnak

Salm catialtu [Psalmist] nih Pathian kong a chim tikah “Sunparnak le rumra cu a velchum ah an um i lianhngannak le dawhnak cu a biakinn chungah an um” (Ps. 96:6) tiah a ti.

Khrih Dawhnak:

Vawlei car i a keu mi thingkung bantuk in a sal cu a tthang, cucu Bawipa duhning a rak si.  Zoh kan duhnak hnga ding ah i dawhnak le rumra zeihmanh a ngei lo.  Iang zeihmanh a ngei lo i a pumrua zong a chuakthiammi a si lo (Isaiah 53:2).

Khrih cu minung in a langh caah a pumrua le muisam in aa dawhnak a um lai.  Dawhlonak zong a um ve lai.  A bikin, Vailam cungah hliamhma he an thlai lio hna cu dawhnak a ngei lo.  Tih tu a nung.  Nain, chunglei dawhnak in a khat.

Rev. Dr. Cuai Sang nih hla a phuahmi ah:

“Lianhngannak he Jerusalem na luh lio ah ai dawh an ti.  Sihmanhsehlaw, Vailam cungah an sualnak ngaithiam hna na ti kha kei caah cun naa dawh khun, ka Bawipa” tiah a ti.  Hi hi chunglei in dawhnak a si.

I Peter 3:3 – 5: “Lenglei ttamhnak, nan sam phiarning te hna, nan tthi nan hlawn te hna, nan thil nan thuam te hna ah khan nan i dawhnak cu a um a si lo.  Nan i dawhnak cu nan chung muru ah a um awk a si i cu i dawhnak cu a tar kho lomi nemnak le daihnak lungthin, Pathian mithmuh i a sungbikmi thil kha a si.  Pathian a rak i bochanmi nu hna cu, cu bantuk in an i dawhnak simi an si – an va le nawl ngaihnak ah khan an i dawhnak cu a si” tiah a ti.  

Hi Khrih dawhnak cu vawlei khuazakip ah kan aupi mi cu a si.  Khrih ah aa dawhmi si ding ah i zuam hna usih.

 

Rev. Dr. C Duh Kam
Senior Pastor
Chin Baptist Mission Church

Other Sermons