Posted on Sun, September 16, 2018

Fapa hniang nih “Ka pa, ka co hnga ding ro cu ka pe ko” tiah a hal. A upa he ro cu a cheuh hna. Fapa hniang nih a co hnga ding ro cu a ngeih dih. Ram dang ah khual tlawn aa thawh. A ngeih chaw vialte cu a va sawksam dih cikcek. Cu ram chung ah mangtaam a tlung i rawltaam tihal in bawmh hau in a um cang. 

Fapa tlau nun cu hlawhhlang nu lennak ah phaisa hna hloh dih hi a si (Phungthlukbia 29:3). Fapa hniang nih rawltam tihal in a um i vok nih an eimi bekawng hmanh ei a duh tuk. A pa rumnak kha a theih than. Man phalh in a ummi sin-um hna nih rawl cu ei cawk lo in an ngeih kha a theih than. A pa sin ah kir i a sin-um pakhat bantuk in um ding aa tim. A tho duak i a pa sin ah cun a kal. 

Dawtu pa nih cun a fapa hniang nih a kal taak chung vialte cu zei dang ruat lo in, a kir than ding mi lawng cu a ruat. Fapa hniang a rak tlun lio cu lam hlat pi ah a hei hmuh. Fapa hniang cu a hei tlik hnawh. A baan in a kuh i a hnamh ko. A tlaumi fapa hniang cu sin-um in si lo in, fapa thiam in a cohlan. Lunglawmhnak puai a tuahpiak. 

Dawtu pa thinlung cu fale caah aa khar bal lo, aa ong zungzal. Dawtu pa cu a rum tuk. Tlang thong khat cung ah a tlawngmi satil vialte cu A ta an si dih (Salm 50:10). Vawlei le a chung ummi thil vialte hi Amah ta an si (Salm 24:1). 

Dawtu pa cu fale kan caah a rum. A thin a fual. Dawtnak le vel le zaangfah-zawnruahnak thinlung in a khat. Hmun dang kal ding a kan siang lo. Kan tlau lio caan hmanh ah a kan philh kho lotu dawtu Pa a si. Kan umnak ding caah A pennak inn cu a kan sakpiak. Thluachuah a kan pek. Lung hnangam tein a kan kilven.

Dawtu pa vialte hna, Happy Father’s Day!

Other Sermons