An tlung cang hna.

Kan Khrihfabu chungtel  a simi Kan senior Pastor Rev.Dr.C.Duh Kam le a inn chungnu Pi Za Ci, Khrihfa upa Pu Van Ling le a fanu Blessing hna cu March 13, 2012 in  Mizoram, India an tlawnnak in kan hnu zarh nihnih ni kha dam te kan sin a hung phan than cang hna. Kan Pastor Rev.Dr.C.Duh Kam cu Mizoram, Longtlai khua hrambunh Lairam Khrihfabu (Lairam Khrista Kohhran) Civui pi ah an sawm i, cu zong cu a va zawh pah. Kawlram ramri Mizo ram khuate pawl nih an rak don i, pangpar thi hna an awih. Lairam Autonomas District Council upa pawl zong nih an don hna. Cun kan Pastor le a innchung nu cu Norway, Germany ram zong an va tlawng pah kho.

Mino Leadership Training

CBMC Mino upa hna hruainak le khuakhannak in tuahmi Mino Retreat ( Leadership Training) tuahnak cu Pathian lamhruainak thawngin March 2-3, 2012 tiang tuah a si i, tlamtling tein lim a si cang. Cawnpiaktu an sawmmi hi, Pu Nun Uk Cung (Vice-Chairman, CBMC Literature & Culture) Pu Siang Dun (Church Secretary) Pu Zo Tum Hmung (Chairman, Building Committee) Rev.Dr.C.Duh Kam (Senior Pastor) hna an si. Mino lawng si loin upa zong an kai hna. A kaimi paoh nih aa lunghmuih lo an um lo. Khrihfabu pakhat a ngan a damnak dingah a herh hrimhrim mi zong a si tiah Mino a kaimi chungin an chim.  Mino sawmli hrang an kai kho. An cawn piakmi hna cu “Nihin Mino si i thaizing Hruaitu” a si dingmi nih zeitin dah kan than a herh,  Mino le mino i hruainak ah, hmailei caah mipi hruaitu si tikah zei bantuk dah kan i zulh a hau,  Meeting tuah lio i umto thut dir ding, mipakhat le khat I upat a hauh ziah” tit e hna an kan cawn piak.  Training kai chung din ei, chuncaw zong mino nih rin a si.  March 3, 2012 zaan ah Mino Pumhnak in an Training cu donghter asi.

.............................................................................................................

Mino Upa Khual An tlawng

CBMC Mino bu chungin Mino upa minung pathum (Lg. Monica Uk, Tv. Jonah, Tv. Biak Tha Hmung) hna cu a ra laimi July thla ah tuah dingmi CBC, USA Civui tikah Mino cawlcanghnak konghe pehtlai in Indianapolis ah Meeting tuah ah an kal. Chung 52 a si cangmi CBC, USA civui tikah khual an tamtuk lai caah zeitin dah kan i zohkhenh lai, timi kong te hna zong an ceih chi lai. A voi (4) nak Chin Baptist Churches, USA civui ah Indianapolis, CEBC Khrihfabu ah July thla ah tuah dingin timhlamh a si. CBC, USA cu rak dirh ka ah CBFA ti a rak si i, 2010 DC Area civui pi ah CBC, USA tiah a min cu thlen a si. A voikhatnak Cicui ah Michigan State, Battle Creek khua ah 2006 kum ah tuah a rak asi.

12nk CBMC Chuah Ni :

September 11, 2011 Zarhpini cu CBMC Khrihfabu Kum 12 tlinnak asi.  Special Sunday in kan  hman. Sunday School Action song piah an thiam. Pastor nih phung an kan chimh. Kan I pumh dih ah Biakinn tang hall ah zaanriah ei nak le nuamhnak kan tuah. Kan zaanriah cu kan Mino hna nih it loin an kan chuan piakmi asi. CBMC cu a luancia 1999 kum ah Kan pa le kan u le tlawmpal nih rak dirhmi asi. Washington DC kiangkap ahhin 1995 hlan ahcun kanmah  Laitlai ahcun Pu Roland Maung lawng hi a rak um. Asinain 1996 kum hnu lei in India le Yangon lei in a phanmi an hun i chap deuhdeuh , Laimi nih chaitni, Thatni kan ton tikah tiin “Chiat-that Bu” an rak dirh. Cu lawng si loin hmunkhat pumhnak tete zong an rak ngei. A donghnak ah a zei si pek ah Khrihfabu i dirh ko seh tiin thlacamnak he CBMC cu an rak dirh. Nihin ni ahcun CBMC cu kum 12 zong a tling cang i Khrihfabu pi ah Pathian nih a hun ser. Cu lawng a si lo, CBMC Khrihfabu nih Lai Baptist Church le Chin Bethel Church zong a hrin hna.  Hmailei caan zongah CBMC hi Pathian nih thluahchuah pe sehlaw cu a thluahchuah cu amah Pathian ramkauhnak le miphun ca riantuantu si hram seh, tihi kan saduhthat a si. >>> Video Zoh >>> ..asiloah ... >>>>Hmanthlak>>>

.......................................................................................................................

2nk 2011 CBMC Picnic & Food Bazaar

: CBMC Biakinn saknak ah Fund kawlnak Food Bazaar le Picnic cu September 03, 2011 ahkhan Savage Park ah hlunghlai taktak in tuah a si. Lai rawl phunphun le Kawl rawl phunphun , Changreu thawthaw zuar  a si. A rak ra khomi dih lak, a rak kan din ei pitu hna dihlak an i lungsi dih. Cu lawng a si lo. Nuamnak phunphun, Leentecelhnak phunphun zong tuah chih a si. Hngakchia bik in upa bik tiang caah leente celhnak a tling.  A donghnak ah lucky ticket onnak zong tuah chih a si. Lucky Ticket  pakhatnak laksawng caah Toshiba TV 40” zong  Mah That e chung nih an kan hlut. Kan I lawmh khunnak cu CBMC chungtel piin ah kan unau a simi MCC, LBC, ZCC hna nih an kan chuahpi, an kan nuamhpi, an kan ei pi, an kan dinpi caah kan i lawm hringhran. CBMC nih Biakinn kan ngeih khawh hlan chung paoh Fund kawlnak caah Food Bazaar cu kum fatin tuah peng dingin timhlamh a si. >>>Video Zoh>>> Asiloah >>>Hmanthlak zoh>>>>

.........................................................................................

‘Khrihfa inn Chungkhar’ Cawn piaknak:

CBMC Khrihfabu Nubu hruainak in “Khrihfa inn chungkhar kongkau” cawnpiaknak cu August 19-20, 2011 tiang 7141 Beverly Dr, Elkridge, MD 21075 ah tuah a si. Cawn piaktu ah Houston, TX in Rev.Dr.Mang Tiak an sawn. Thaithawh, Chuncaw, Zaanriah rin in cawn a si.  A thiam taktak. Khrihfa inn chungkhar a simi nih zeitin dah chungkhar kan dirh lai I, nupi le pasal le zeitin dah kan I dawt lai, Kan fa le caah zei bantuk cawn piaknak dah kan tuah lai te hna an kan cawn piak.   Zarhpini zong amah nih phung a kan chimh.
 Dr. Mang Tiak hi a thiam taktak mi a si. Rangoon University in Law in BA le MA degree, Philippines ah Bible lei in Master of Divinity degree, Princeton Theological Seminary, New Jersey in Master of Theology le Chicago in Doctor of Ministry degree a hmumi a si. Cu hlei ah sizung ah pastor (chaplain) ttuannak kha a cawng tthan i khrihfa innchungkhar kong hi a thiam taktak mi a si. American Baptist Churches nih ordination hi an pek mi a si. Biachim a thiam, ngaih a nuam taktak.

. ...........................................................................

CBMC’s Summer Revival Crusade :

Thawngtha chimtu Tv. Vanlalsailova hmang in \CBMC’s Summer Revival Crusade cu July 6-9, 2011 tiang Columbia, MD, ummi Chin Bethel Church an i pumhnak biakinn ah tuah a si. Crusade kai mi zaankhat ah 400 helham peng an si. CBMC Khrihfabu lawng si loin CBC Khrihfabu zongnih zaan fatin an kan telpi. Crusade chungah US tbk ramtha phak hnu zong i Pathian theih a herh ning le Zisuh putmi Cross cu zumtu hna nih dong loin kan put pek awk a si, timi te hna a chim. Thawngtha a chim pah in amah nih a rem a ti ning in Pathian hladawh tampi an kan sak piak. A aw a tha, hlasak a thiam, a biatak. Laimi nih hlasak/ phuah kan thiam deuh nak hnga ruahnak tete zong a chim chih. July 10. 2011 i CBMC’s Mission Sunday zongah amah nih thawngtha an kan chimh beh. Vanlalsailova ah Mizo ram ah hlasak minthang a si i, hlan ahcun zuunhla zong a rak sa nain a pianthar hnu ah Pathian hla lawng a sami Khrih saltha a si.

.............................................................

Rev.Dr.C.Duh Kam Malaysia ah :

CBMC Church Pastor Rev. Dr. C. Duh Kam cu July 4, 2011 ahkhan Malaysia Chin Refugee hna tlawn awk ah ABC, USA (American Baptist Churches) General Secretary Dr. Roy Medley he an kal. Cu kal pah cun July 16-17, 2011 Malaysia Laimi Civui pi ah thawngthachim an sawm i, caan hmannak a va ngei pah te lai. July 21, 2011 ah a Khrihfabu CBMC ah a rak kir than te lai. Rev.Dr.C.Duh Kam hi 2004 in CBMC, DC Area ah Pastor tuan hram a rak i thok. CBC, USA, (hlan ah CBFA tiin auhmi ) zongah a term hnihnak Executive Minister a kan tuan piak cuammah mi a si. Amah a tuan chungah CBC, USA ah chungtel Khrihfabu 40 an phan i, phaisa $ 160000 leeng in Pathian ram, miphun le ram caah rian an tuan cuahmah

. ................................................................................................................................................................

CBMC Picnic & Food Bazaar :

Kum fatin tuah tawnmi CBMC Picnic cu May 28, 2010 ah  Savage Part, MD ah hlunhlai taktak in kan tuah. Cu Picnic tuah pah in CBMC Building Fund caah Food Bazaar kan tuah chih. A nuam taktak. Minung 400 leng an chuak kho. Lairawl, Kawl rawkl a tling dih. Changreu phunphun a  tling. Mino zuarmi Sacek ko a man khun. Hini I hmuhmi dihlak phaisa hi CBMC Builhding fund ah a kal ding a si. Leentecelhnak phun a  tling. Mara Community Church, Zotung Chritian Church,Chin Bethel Church, Lai Baptist Church tiin DC Area hrambunh Khrihfabu pali nih an kan tel pi.  Khrihfa bu in Volleyball bengh zuamnak le Hrihhnuh zuamnak a um i, Pa Volleyball ah ZCC nih pakhatnak an hmuh. Anmah hi nikum CBMC Cup zongah Pakhatnak a hmu ciami an si. Pa hrihnuh zuamnak ah CBMC nih pakhatnak an hmuh. Laksawng phunphun peknak an um. A paw kau bikmi laksawng tiang in an pek. CBMC 2011 Open tenis tuk zuamnak zong a um. Motorcycle auction (Le-laan suai) nak zong kan tuah. Lucky Ticket onnak zong kan tuah. A donghnak ah sian lo buin CBMC church pastor thlacamnak in kan caan kan ngol.

  ...........................................................

MCC Gospel Teams, CBMC Church ah : 

May 22, 2010 cu CBMC Ni Sunglawi pakhat a si. Mara Community Church in Gospel teams CBMC ah an ra. An Pastor Rev. Paul Zaw Khai nih a zulh hna i, CBMC ah phung a kan chimh.  A dang cu mino lawngte an si. Mino tete an si nain Pathian an duh ning zoh ah lawmh an um taktak. An Praise N Worship hruai ding hrim a tha kho taktak. Solo, Duet an thiam dih. Amah belte a caan aa tet khawt deuh i Action song te hna an hman manh lomi a um. Praise N Worship siseh, hlasak, phungchim siseh Laiholh tein an kan hman piak khawh dih caah kan i lawm chinchin. Caan hman ding zong a tluangtlam. Pumh dih khawh in CBMC mino hna hruainak in Biakinn tang Hall ah MCC mino le CBMC mino, CBMC Church Council Member pawl rawl dum ttinak le lungduh biaruahnak kan ngei hna. A donghnak zong sian lo bu tein kan ttian hna. Hi Mara Community Church hi nikum zongah CBMC Mino nih an rak leen bal cang hna. Hi Gospel team tlawnnak nihhin  Laimi pakhat kan sinak le Pathian pakhat kan biakttinak fehter chin koseh.

....................................

Mother’s Day :

2011, May 08 cu  a sunglawi  tukmi Mother’s Day (Hringtu Nu Ni) a si.  CBMC Khrihfa bu zong Special Day in caan kan hman. CBMC Nubu hruainak in pumh a si i,  a tu lio CBMC nubu Chairman Pi Tin Tin Htun nih phung a kan chimh. Nu hi hlan ahcun nihsawhmi kan  si nain a tu ahcun kan si ti lo, a ngai tiah cun hlan pi in nu hna nih zeitluk indah a rak biapit, timi kong a chim.  Nu le upatnak caah fa a ngei cangmi nu paohpaoh  laksawng chuah an si. Hringtu nu a nung rihmi hna le a thi cangmi hna caah pangpae tonhnak kan tuah. Pangpartonh lio ah solo in hlasak nak a um.  Hi ni hi ni sunglawi a si bantuk in Church School kan fale hna zongnih an kan pumh pi.  Groupsong le Action song cawh in  Pathian an thngthat. A nuam hringhrang. Cu lawng si lo in, hi ni kan tuahmi nihhin Sunghno nu le dawtnak a thar in hun theih pengnak a kan pek.  CBMC kan nu bik pakhat a simi Esther Nu nih hringtu nu le dawtnak a thuh sannak kong a kan chimh ...................................................

Esther  Sunday

:2011, April 24 ni i Esther Sunday cu , Zisuh Khrih valam cungah a thih i, nithum hnu ah  a thawhthan ni a si. CBMC Khrihfabu zonghi hi zarhpi ni cu Special day in an hman i, Biakinn tang Hall ah zaanriah dumttinak le nuamhnak in caan hman a si.Hi ni hi kan nih Khrihfami hna caah cun ni sunglawi a si. A luancia kum 2000 hrawng ah a rak cangmi a si i, minung dihlak sual in a thi dingmi kan can ai ah Bawi Zisuh a rak thi i, nithum hnu ah a rak thawhthan ni sunglawi a si.  Cu tic un sual man thihnak a tuar ding minung cu khamh kan si i, mithiang ah an kan cohlan.  Rev.Dr.C.Duh Kam nih phung an kan chimh. Church School kan fa le hna nih  hlaremh le kutke piah in Pathian bia an kan cawn piak. Solo, Groupsong pawl zong an tha. Biakinn inntang Hall ah zaan suimilam 8 tiang kan I nuam, Pathian kan thangthat. CBMC Khrihfabu cu inn chungkhar pakhat bantuk kan si. Zei paoh kan kan I nuam ttin, kan ngeihchia tti, Pathian kan thangtthat tti.

CBMC  Khrismas :  December 25, 2010 (Zarhteni) cu nidang he aa lo lo. Khrihfami hna nih kan I ngeih bikmi Khrismas Ni (Christmas) a si. Kannih CBMC Khrihfabu zong  hlunghlai taktak in Zisuh chuahni Khrismas Ni cu kan lawm ve. CBMC Biakinn ah  sangkip hlaremh zuamnak, hlasanak dangdang hna in kan tuah. Sangkip Hlaremh zumnak ah Fredercik sang nih pakhatnak, Baltimore sang nih pahnihnak le Laurel sang nih pathumnak an hmuh. Pumh dih khawh in Biakinn tang social hall ah lengkhawmhnak, Drama, Action song hna in nuamhnak kan peh than. Hmunkhat rawl dumtinak kan ngei.  Kan nu le hna an rawlchumh thiam ding cu a mak ko.  Kan nu le hna I, Fashion Show zuamnak ko nih mi an kan nuamh ter khun.  Khrihfa Upa pawl nih Laitlang  i missionary hmasa pawl kong Dram in an kan piah piak.  Cun a donghnak ah Mino hna nih fund kawlnak Lucky Tiket onnak an tuah. Cuticun December 25, Bawipa Zisuh chuah nih cu kan hmanh hna hi zaan suimilam pariat ( 8 : 00 pm) hrawngah kan i lim

...................................................................................

Singsong Service : Dec/06/2010, Kumkhat voikhat tuahmi CBMC Singsong Service tu Mino hna nih hlunhlai ngai in an kan tuah pi. Solo thiamthiam, Duet, Groupsong, Actionsong  thatha in Pathian an thangthat. Kan music tumtu pawl zong an biatak in kum fatin an thangcho chin lengmang, ti a lang. CBMC Music group cu Mino( Youth Deppartment) tangah a ummi an si i, zarh fatin kan i pumhnak music kongkau an kan tawl rel piaktu an si. A hlei in tutan Singsong Service nih mi thinlung a lak khunnak cu Mino hna i an Drama tawi a si. Bawi Zisuh a chuahnak kong le hi Zisuh chuahnak ruangah kan nihnih zeitin dah kan rak cohlan ve lai, ti pawl an kan cawnpiak.  Drama tawi te an kan piah piak.  CBMC Church Pastor Rev.Dr.C.Duh Kam nih Phungchim  tawi an kan chim. Mi lung a hmui ko. CBMC Khrihfabu nih 1999 kum ah rak dihrmi a si i, 2010 kum cun kum 11 a kal ve cang. 2005 in CBMC mino hna thithruainak in SingSong Service hi kum fatin December a zarhkhatnak paoh ah a tuah a si i, tukum 2010 hin cun a voiruknak kan tuah a si. Hi Singsong Service tlamtling tein a kan tuah tertu kan Pathian a min thangthat si koseh.

....................................................................................

Happy Thanksgiving : 2010 Thanksgiving cu Pathian lamhruainak thawng in CBMC khrihfabu nih nuam ngai le hlunghlai ngai I, Nov.25.2010 (Nili Ni) ah tuah a si. Bathel Christian Academy, Savage, Maryland ah tuah a si.  Minung 300 helham hrawng kan chuak kho. CBMC Church Vice-Chairman Pu Roland Maung nih Thanksgiving a rak I thoknak tuanbia tawi an kan chim. Mino hna Praise N Worship nih mi a nuamh ter. Pi Tin Tin Htun nih solo a kan sak piak. Rev.Dr.C.Duh Kam nih phung a kam chimh. Pumh dih khawh in leengkhawmhnak kan ngei. Pu Lal Bat (Church Chairman) nih a kan hruai i, a nuam hringhrang. Pathian dawtnak chimnak pakhat cio nih an ngeih. Zaanlei sang ah nubu hna nih a kan tolrel pimi zaaniah dum ttinak kan ngei.  Kan zaanriah zong lai rawl tein kan i hrawm hna. Kawmno, Kawhra, Arlu nen…tbk pawl an si.

_________________________

CBMC Church School Sunday:  Nihin November 14, 2010 cu CBMC khrihfabu nih a ngeihmi kumkhat voikhat Church School nih Pulpit tlaihni (Church School Sunday) a si. Caan hmangtu kan fanau le an caan hman ning a tha tuk hringhran. Upa zongnih cawn awk tampi an kan chimh. Solo, Groupsong, Baibal zohlo rel, Action song, Drama te pawl nih caan an kan hman piak khawh. Caan hmangtu an dihlak cungah lawmhnak kan chim cawk lo. Pathian nih umpi hram hna seh. Drama an kan piah piakmi sullam ko a tha. Minung a simi paoh, harnak kan ton ah siseh, nuamhnak, ngeihchiatnak, cun zei banuk thil kan ton poah ah Pathian cung tuah lawmhnak kan chimh awk a si, ti si.Cun hi Chur ch School caanhmannak ah a hlei in lawmh awk pakhat a simi cu, Chin Bathel Church in Church School sayate, hngakchia hna an si.  CBMC Church School Sunday ah Groupsong le Action song in an kan tel pi. Chin Bathel Church hi, CBMC chungtel an rak si ko nain Biakinn pumhnak I relrem lo ruangah inndang an kan chuah takmi an si.

CBMC Youth Sunday : October 31, 2010 cu kumkhat voikhat Mino hna nih Biakinn pulpit an tlaihni Mino Caanhman Zarh (Youth Sunday) a si.  Kan mino hna an i timhlamhnak a tha, hlan kan te an i an rak itimhcia a fiang, zeicatiah caan hmangtu dihlak an tlam a tling a tha. Praise N Worship, Solo Sermon tawi, groupsong, Choirhna an caanhman a tha dih. Cun Church School lei in group pakhat nih groupsong an kan ngei h piak khawh. Tutan Mino Caanhman cu an tangtar ah “Tho usih law sa usih, Nehemiah 2:18” kha a si.  CBMC Khrihfabu nih zeitluk indah biakinn kan herh I, cu biakinn ngeih khawhnak ahcun CBMC khrihfabu chungtel dihlak kan thawh tti, kan ttuantti a herh zia kha an kan chimh. Tatan Mino Caanhmanh Zarh (Youth Sunday) a hun I dawh khun nak cu Mino dihlak nih Laithuam te he an kan pumhpi mi hi a si.

Donghnak ah Mino hotu Tv. Lian Maung Bik nih lawmhnak bia a chim. Mino hlacawnnak ah a herh lomi leeng le val hna cungah lawmhnak biak a chim. A chimmi pakhat cu, “CBMC Khrihfabu nihhin zeidah ka caah  tuah lai ti nakin CBMC Khrihfabu caah zeidah ka thathnem lai” tit u hi kannih Mino nih cun kan I zuam awk a si, a ti.

------------------------------------------------------

2nd CBMC Food Bazaar (Oct/23/2010) : 2010 chungah a voihnihnak CBMC Food Bazaar ah October 23, 2010 ah Savage Park ah tlamtling tein kan tuah khawh caah Pathian min kan thangthat. CBMC Food Bazaar ka tuah a ruang cu, CBMC Khrihfabu nih  Biakinn kan ngeih ve hrimhrim a herh ti ruangah Biakinn saknak Fund Rising ah tuahmi a si. 2009 kum in kan thok i, 2010 chungah voihnih kan tuah. Tutan kan Food Bazaar cu awidang kan tuah tawnmi nakin phun dang te a hung si.  Kan kiangkap um Kan Lai (Chin) miphun hawi a simi Chin Bathel Church (CBC), Mara Community Church (MCC) le Zotung Christian Church (ZCC) hna nih nuam taktak in kan telpi caah a si.  Food Bazaar lawng si loin Fellowship phunphun a um chih. Volleyball bengh zuamnak te hna kan tuah I, Mara Community Church nih pakhatnak an lak. An nih Church cu an tan a rual taktak. Uniform bak he an chuak. DC Laipa pakhat nihcun, “Hi CBMC Food Bazaar hi Fund Rising ca sawhsawh lawng si loin Khrihfa bu khat le khat dawt tertu, Chin miphun pakhat kan si nak a hramthok s ihram seh” a ti.

...ooooOoooo.....

CBMC Birthday (Sept 12, 2010) : Kum (11)Nak CBMC Birthday (Chuah Ni) cu September 12, 2010 kha a tlin ni a si. CBMC Biakinn ah hlunghlai ngai in kan tuah.  Biakinn Hall ah nuamhnak a phunphun, drama hna le zaan riah dum tinak in kan tuah. Cu nih cu Biakinn kan khat tirt-terh. CBMC Church Pastor Rev. Dr. C. Duh Kam nih phung an kan chimh. Pu Zo Tum Hmung nih CBMC tuanbia le CBMC cu zeiruang ahdah dirh asi, ti a chim. CBMC chungtel hna sin in Degree le Certificated an kan hmuh piakmi hna laksawng pek nak zong tuah a si. CBMC an rak thok lio September 1999 ahhin CBMC chungtel 57 in rak thokmi a si nain nihin nih ahcun CBMC cu te fa Khrihfa bu hnih (Lai Baptist Church le Chin Bethel Church) zong a hrin piin chungtel  500 leng pi kan phan cang. Pathian nih CBMC hi hmeilei lam hruai sehlaw thang chin lengmang ko seh.

2010 CBMC Picnic, CBMC Cup and Food Bazaar :  2010 CBMC Pinic cu CBMC’s Cup le Biainn saknak fund rising tuahnak Food Bazaar he kemh chih in September 04, 2010 ah Savage Park ah hlunghlai taktak in tuah a si. Minung 300 leng kan chuak. CBMC chungtel  si loin CBC (Chin Bethel Church) pawl zongnih lungrual tein an kan tel pi.  Nuamnak phunphun, Leente celhnak phunphun tuah a si.  Volleyball, Tenis, Hrihnuh te hna a sangsang, nutung, nungak, patung tlangval ti te hna in zuam a si.  CBMC’s Cup pumpululh chuih zuamnak zong kan tuah i, group pali ah then in zuamnak a um. 2009 Champion Laurel-A Team cu tukum zong Champion thiam an si. Cu lawng a si lo, kan nu le hna le kan mino hna rawl phunkip, changreu phunkip le soup phunkip ko nih mi a nuam pi piin ah a hlunhlai ter khun. Lucky Ticket  zong tuah a si i , a nuam kho taktak.  Hini hi hmuhmi tangka paoh hi CBMC biakinn saknak fund ah hman ding a si.

Lg. Bawi Tha Par le Chicago Mission Trip : Tu college kai kai timnak hi Liberty University asi. Khrihfa Baptist University asi, Lynchburg Virginia  ah a ummi si. Cun anmah sianginn nih program an ngeih mi cu Xtreme Impact asi. Xtreme Impact director hi Pathian a thei tuk mi si le amah nih ai timh mi cu. Mino pawl, Pathian a theimi Pathian rian tuan a duh mi pawl caah, mission trip khuadangdang ah an kal lai le, minung a tlau mi caah gospel an va chimh hna lai ati.  
Mah Xtreme Impact kong cu Liberty University ka va tlawn lio ah a kan chimh le inn ka ttiin khan ka interest ngai le an website ah ka kal le, Question tete a kan hal le, Pathian lei ah zeitulk in hme ai biatak, maw Pathian riantuan duh tak mi si maw cun experience hna a ngei maw? Cun a hmaan ning te khan ka va answer ve le, Xtreme Impact pawl nih an rak rel le an hna tla. Cucun khoi ka hme kal na duh a kan ti...Option a kan pek Chicago,Thailand,Brazil,India,Italy,Jamaica,Costa Rica,Zambia,Tanzania
Cun a ni kha a phan cang le Liberty University ah cun kan i tong dih, keimah bantuk kal ding mi pawl kha, missionary a kan ti. Kanmah le kan team(Chicago kaldingmi pawl) cio kan i tong cun experience tak2 a ngei mi kha Mission Leader an ti, le kanmah team ah 10 kan ngei. Training biatak tein kumkhat chung a kai mi pawl an si, annih cu College student an si. Cun missionary kha minug 25 kan si. Ka team ah keimah lawng mirang asi lo mi ka si.
 Cun Liberty University ahcun zarhkhat training a kan pek. Kan kalnak ding history, tuah ding le tuah lo ding, mi gospel va chimh tikah idea tete. Cucun a zarhhnihnak ah Chicago cun kan va kal le biakinn New Hope Bible Church timi ah a kan tlung. Mah biakinn kha khaka khua kan um chung kan umnak asi. Cun an member pawl le Pastor he kan i tong hna. Cun anmah nih khan training nihnih ni chung a kan pek ve. Kan mission tuah ding mi pawl cun zeitin hme kan tuah lai, cun an sang kong a kan chimh.
 

A kan chimhmi pawl
Chicago chungah kan sang hi ai thatmi a tamnak bik asi, kan sang hi gang a phun2 an um, ai ral tak mi hna an um, innleng nan chuah tikah nan kut in nan duh mi poah nan va tuah la lo, gang sign asi kho men cun mah color pawl hi hruk a ngah lo, gang color an si le nan i hruk i innleng nan chuah ahcun, mah gang color i a ral mi pawl nih meithal in an in kap kho. Cucun nu pawl angki a nganpi le bongbi tight lo mi lawng nan i hruk kho, maw pa pawl a mit nan thitter ahcun a hawi le pawl he an in tleih lai le an in zampikho, Cun minung nan hmuh mi pawl nan va zoh tuk lai lo, drug an i zuarh lio hna nan zoh i an in hmuh ahcun thah an in tim ko lai.
 
A van chimhnu ah cun hopoah innleng chuah kan ttih dih, nain bible a kan rel piak le a kan cawnpiak. Pathian nih a kan umpi ding mi cu zeihmanh ttih ding um tung lo a kan ti. A sermon mi kan thinlung ah rian a tuan dih. Cun kan thawh ka in i upnak kan tuah peng. Kan sualnak kha Pathian sinah kan up dih cun Pathian kha kan kalnak ding a a kan um pi peng khawhnak ding kan hal cun san a tlai mi, amah thawngthabia a va phuang kho mi kan si khawhnak dingah, kan thawhka in i upnak peng. Mah bantuk i upnak, Pathian kan sawm lo cun, kanmah minung sinak in tuan kan i tiim cun ttih a nung tuk ding si.

So zarhkhatnak kha cleaning kan tuah, zarhkhat harwng, innleng 98-100 degree hrawng si peng, kan thlan chuak peng. All day an sang kan thenh piak peng hna le mah kan thenh lio ah a kan tihram peng fawn. minak pawwl nih. Kan tha a chia poah ah pakhat le khat tha kan i pek than cun thla kan i cam piak.

Zarh2nak kha children bible school kan tuah. Park ah kan va kal le an park kan thenh piak hna, cun thla kan camh. Mah park kha sualnak tuah ding ah an hman peng mi park si le, hngakchia pawl hrim kan kal ngam lonak asi. Cun kan dih tikah kan va sawm hna inn kipah. Le an rak khan bible cawnnak kan tuah piak cun lete kan celhpi hna. Mah bible school zarhkhat kan tuah lioah, hngakchia pathum kha bia biatak ten ka va ruah hna. Jesuh kong ka chimh. Pakhat nu kha cu JEsuh kong a thieh nain a nunnak ah harnak a tong tuk le, a zum kho lo. Cun bible ka rel piak ka chimh chimh, nazi 2 hrawng ka chimh, cu hnu cun ai fiang le thla kan cam ti. Cun bible a ka hal le ka cawk piak.
A dang pa2 kha cu Jesuh hodah si an thei bak lo, an kum upa ngai cang fawn nain ho hme Jesuh cu si a kan ti le ka chimh chimh hna, sauuu tatak.

Ka khuaruah a har tuk, Jesuh kong an theih lo mi kha. Cun keimah zeihmanh a thiam lomi, tuah kho lo mi mizo ram a tthang mi, Pathian nih vawleicung ram thabik ah a ka phakter le a mah thawngtha bia chim ding in a ka hman duh ve. Ka chimh mi hna an zumh lo hmanh ah an theih mi kha a tha mi si. Cun bible kha mah hngakchia nu te ka pek ah, ai LAWMH ning te hi, bible an duh ning le kannih vial inn ah 5,6 rawng rel sasai loin kan chiah. MAh khual ka tlawn mi hi Pathian nih a ka timh piak mi bak si. Ka ruah lo ning leng in ka nunnak ah rian a tuan. Hi hnuah amah rian ka tuan duh bak ko kai fiang.

Sianglo Bu in a kal (June 20, 2010): Chin Baptist Mission Church (DC Area) I kan Founder pakhat zong a simi, Cun CBMC dirh ka in Pastor a kan tuan piaktu Rev. Philip Hreng Ling cu Chin Bathel Church nih Church Pastor dingah an hal caah CBMC Khrihfa bu nih caan zeimaw zat ceihhmainak an ngeih hnu ah Chin Bathel Church (CBC) ah Pastor tuan dingin kal awk ah an hna a tla.  Rev. Philip Hreng Ling hi CBMC an rak dirh lio 1998 khan CBMC ah a vokhatnak Pastor a tuanmi a si I, nihin ni tiang CBMC ah Pathian riantuan awk ah a puma a pemi a si. A tu CBMC church kan pumhnak biakin Luther Rice Memorial Baptist zong amah amah nih a rak hlathlai i, cutin cun Biakinn zong cu hlanh kan rak si.

CBMC's Singsong Service 2009

CBMC’s Singsong Service, 2009 cu a nuam hringhran. Dec, 06, 2009 ah tuah a si. Kum fatin December zarhkhatnak paoh ah tuah a si.Mi pakhat nihcun, hitluk in kan fanau le music an thancho hi ka thei bal lo, a ti. Music thilri pawl zong Khrihfabu nih a thar cawkpiakmi a si kaw, a tha khun rua. CBMC hlasak thiam an tling. Tutan Singsong service  kumdang he aa dannak cu, hlasa mi paoh nih sak ciami hla sa loin, mah phuah chommi cio sak sikaw a tha khun.
CBMC music group hi Tv. Van Peng Hnin nih a hruai hna hi a tumtu pawl hi, Sailo Thang, Jame, Lian Lal Hmung, Hrin Kung Sang, Biak Hlei Sang, Bawi Tin Lian, Johan Thang hna an si.
Tutan CBMC’s Singsong Service 2009 hlasa hna cu Lg. Sui Ci Tial, Lg. Monica Uk, Lg. Bawi Tha Par, Lg, Dim Dim, Tv. Siang Hmun Lian, Tv. Than Htay Aung. Tv. Ram Hei, Tv. Aron Uk, …. Te hna an si.
Kum voi zong hinak thiam deuh ding le hinak hlunghlai deuh dingin tuah an I tim.

____________________________________________________________

December 03, 2009 CBMC Thawngpang bultan

1. December zarh khat chungah kan lut cang. December le Christmascu then awk a tha lo. Sang pumhnak zongah Christmas lei hoih in hman cio ding a si lai. Hla zong sermon zong Bawipa Jesuh chuah lawmhnak lei in hmang cio hna u sih.

2. Friday zanlei 4:00 pm ah Laurel biakinn ah Sing Song Service hla cawnnak a um lai. Ai telmi vialte tling te chuah khawh i zuam u. Zarhte chun zongah biakinn social hall ah cawnnak a um thiamthiam lai. Cawnnak hmun a ra kho lo mi cu hla an sa kho lai lo, tiah muzik lei hruaitu hna nih an chim.

3. Zarhpi ni cu kum khat ah vei khat te lawng tuah tawnmi, Sing Song Service caan a si lai. December zarh khat nak a si abntuk in Jesuh chuah lawmh le dawnnak in sunglawi tein amah Pathian thangthat dingah timhmi program a si. Tukhaltu hna le mifim hna cu an i lawm tuk i Bethlehem khua ah naute an va biak. Herod cu a thin a phang i hngakchia a thah ve hna. Tukum Christmas cu Tukhal bantuk le mifim hna bantuk in naute chauh lawm ve hna u sih.

4. Nubu rawlulh thlacamnak cu zarhte ni ah Sailo Thang te inn ah tuah a si lai. Minung tampi nan rak i tel dingah kan in sawm hna. Thla kan cam tikah mah pumpak ca hrim ah hlawknak a si. CBMC ca zongah biatak thlak in thlacam kan hau. Tukforhnak teinak cu thlacam hi a si. Nubu lawng rinh lo in kan zapi in campi dingah kan in sawm hna.

5. Khrihfa upa meeting cu zarhte chunhnu 1:00 - 5:00 pm ah tuah ding a si lai. A hmun cu Pu Robert Sui Nawl te inn ah a si lai. Tukum chungah meeting donghnak zong a si lai caah upa vialte tling tein chuah khawh i zuam hna u sih.

6. Tukum Christmas cu hmunkhat te tuah dingah biakinn hal a si. Kum dang nak sunglawi le nuam deuh in hman kan i zuam hna lai.

7. Bongva Cazual cu hmaizarh thok in a chuak than cang lai. CBMC ca le kan miphun caah a thahnem mi cabia tial khawh cio a si lai. THawng thanh herhmi, theihtlei tete, Thlarau bia le fimnak cawnpiaknak, ralrin ding tete zong van tial cio khawh a si lai. Mino hruaitu hna sinah cabia cu kuat cio ding a si. Tutan ah a chuak kho lo zong hmailei ah a chuak te lai.

_____________________________________________________________

Kan Hnu Zarh Chung CBMC Kan Thawng

1. Sang pumhnak ah thazang chuah cio ding a si lai. Pumh cu pumh lo nak in a tha deuh, thlacam cu cam lo nak in a tha deuh fawn. Thawhlawm fangkhat te na thawhmi khi CCC a phak tikah 1000 renglo a va si. A cawmmi hna an i lawm, petu hna kan ca-ah thla an kan campiak.

2. Zarhte zan ah Mino hlacawn a um lai. A hmun cu Rockville sang, Pu Van Thawng Cung te inn ah a si te lai. Mino vialte chuah khawh i zuam hna u.

3. Tuzarh chungah Pastor le upa te nih sang  thenkhat ah lennak an thok cang. Inn kip thla va cam pah in, biakinn ca-ah fund kawl pah zong a si. Atu tiang inn 30 tluk an len cang mi ah $ 7000 tluk cu Bawipa nih a kan pek cang. Chungkhar cheukhat, nupa ai ceih rih lo i bia ai kam rih lo mi hna nih sang upa te sinah nan i kam zat kha thawng thanh cio ding a si lai. Hmaizarh lei ah lennak an peh than te lai.

4. Zarhpi ni pumhnak a dih hnu ah Dr. Bawi Uk Thang nih tangka khawnnak kong chimnak caan a ngei lai. Laimi nih kan herh ngai mi thil a si ca-ah upa deuh nih cun ngaih khawh cio i zuam hna u sih.

5. October 31, 2009 zarhte ni ah Tho tuah dingah tawlreltu upa te nih an kan sawm. Laurel sang biakinn ah a si lai. Kan Lai nunphung kha Khrihfa phung he i kalh lo tein hmuhsaknak, biachimnak le laam zong a um lai. Tel khawh i zuam cio hna u sih.

6. Mautam concert ah hlasa dingmi, Sung Tin Par, Dawt Hlei Hniang le Solomon Menrihei hna cu nizan ah US an phan cang. Tuzarh ah Dallas khua ah concert an ngei lai. Cu hnu ah Battle Creek, Indianapolis ah an peh te lai. DC ah cun November 28, 2009 (Thanksgiving) zarh ah khin an tuah te lai.

___________________________________________________________________

Nubu Caanhmanzarh: Oct/18/2009 : CBMC hruainak ah kumkhat voikhat poah hi pulpit committee nih nubu (CBMWF, Chin Baptist Mission Women Fellowships) pawl, October 18 2009 cu caanhmannak pulpit an pek hna zarh asi. Kan nu le hna nih hla dawhdawh an kan sak piak. Phungchim tu ah Kawlram  lei in, Prison Ministry lei ah a tuanmi Sayamah Ngun Kil nih phung a chim I, a thiam taktak. Thazaang thatha an kan pek. Hmailei Bawipa ram ca le miphun caah kar hlan chin khawhnak thazaang an kan pek. CBMC Nubu pawl hi, lawmbawm an tuah, Zisuh khual tlung an tuah, CBMC Member chung aa thi-um mi an um paoh ah anmah nih zaanghlei an cawi, Fangthuam an khon, cu tete cun Nubu CBMC mission riantuannak ah tha biatak tein a chuahmi asi. Missionary zong an thlah. Cun mi har le mi sifak zong an bawmh peng hna.   >>>> More>>>>

Thawngpang Hlun # 1 ah...