( ** "T" a tang dehmi ka deh khawh lo caah "T" tangdeh can ah "Y" ka hman i a reltu nih nan rak ka theihthiam piak nak lai...kan nawl hna)

Lunglawmhnak
A tu bantuk in “Malaysia phaan Laimi Tuanbia” hi ka lungchung in yial kai timhnak cu a sau ngai cang. Asinain ka yial lai, tiin cafung ka vun i tlaih i ka ruah tikah zeihmanh yial ding ka thei hawi lo. 2005 lio ahkhan ka hawipa Sakhuui Yha Cung Lian, Salai Chan Duh Ceu hna nih, “Malaysia phaan Laimi kan tuanbia” ti Laimi tuanbia ah philh awk a yha ti bal lai lo. Cucaah hi tuanbia hi nangmah hrimhrim nih na yial a hau, tiah an rak ka forh tawn. Asinain ka tuaktak tikah tuanbia a dikciah i hngalh i timh ahcun phaisa tampi dih in hlat le hlai a hau ding sikaw ka lung hrim nih a rak phaan lo.

Voikhat, 2006 kum hrom thawkka. Ramzaam Mekazin pakhat in capar an ka hal. Yial awk dang hlei ka thei lo i, Malaysia kan um lio, Putra Jaya kong the ka yial kun ko lai, ka ti i, “Zaankhat Putra Jaya ka Dairy” timi te ka yial i, cu ka yial lio ah ka ruahmi cu, Malaysia ka ratnak in a tutiang ka tonmi hi, “Malaysia ah ka philh khawh lomi ni hna” tiin cauk yial ninglaw a yha hnga maw, ka ti.  A hnu deuh i ka hun ruah yhanmi cu, hi” Malaysia ah ka philh khawh lomi ni hna” ka timi nihhin Malaysia ah kelam in har lengmang in a rami kan hawile, kan nau le , kan u le, kan pa, kan nu le hna I “An philh khawh lomi ni hna” a si ve khawh ko yung. A ngai tiah cun Malaysia ahhin an ratnak Lampi in siseh, tlaihkhih in siseh, rian kongkau in siseh keimah nak har deuh le tem deuhmi a khah in an khah yung lai, ka ti. Cucaah hi “Malaysia ah ka philh khawh lomi ni hna”  ka timi nihhin Malaysia phaan Laimi i kan philh khawh lomi ni, kan tuanbia cheubang cu a si ve ko yung, ka ti.

Cutikah ka ca yialmi a tlangpi cu “Malaysia Phaan Laimi Tuanbia” tiah ka let i, ka hngalh fian lomi pawl ah Malaysia i a phaan vemi upa lungfim deuh hna zong ka hal hna. Cucaah hi cauk a hun chuah khawhnak cu a si.Hi cauk a chuah khawhnak ah ruahnak in siseh, Malaysia ah a cangmi theihtlei, thawng, sining pawl a ka bawn chantu hna: Pu Hrang Soe (CCF, Chairman), Pu Thawng Uk ( Norway), Salai Lian Hmung (Australia), Salai Cung Uk Tu (Norway), Piter Thang Cem (USA), Pu Tial Thang, Salai Fung Ling hna cungah lunglawmhnak chim cawk loin ka ngei.

Kh.T.Tluang Hei
Washington DC
May, 8th. 2006

Biahmaiyhi
Laimi kan sining, kan nunphung le kan thilthuam te hna hi cu vawlei cungah zahpi lo dingin an i dawh an saang i chan a dawi kho mi an si nain, midawh soikhat phur tiah Laimi nih kan chamhbaunak zawnte pakhat cu kanmah te i kan tialmi kan tuanbia (history) relawk kan ngeih lomi hi asi. Mirang nih kan tuanbia hi rak kan tialpiak hna hlah seh law relding ngei lo in tuanbia a ngei lomi minung kan si hnga.  Kan pup-pa hna cu ca an rak thiam lo ruangah asi tiah a fawizaannak in kan chim tawn nain cathiam tampi kan chuah hnu zongah Laimi kan tuanbia hi ahohmanh nih tial kan i tim rih lo ti awk asi. Ca i tiallomi tuanbia cu kan gei ve ko nain a ca hrimhrim i tialmi (documented) tuanbia cu kan ngei lo tluk asi.

Cu bantuk i kan tuanbia le kan sining tial kan herh tuk lio caan Tv. Kh. T. Tluang Hei (Malaysia Laimi nihcun Seihnam kan ti) Chanthar Laimi kan tuanbia a ti khawh tawk i a kan tialpiak tikah a cung ah lunglawmnak chim cawk lo ka ngei. Zeicaah tiah Malaysia i Laimi kan kalmi nih hin chiatnak lei he thatnak lei he Laimi kan khupthal a kan leh. A chiatnak lei i zoh ahcun Malay kan phak ruangah nu le va aa then lo ding zong kan i then i, chantim hlanah leng le val no tampi nih an kan thih tak i, a min hmanh kan chim ngam lo mi chanthar zawtnak zong kan i lak. Thatnak lei i zoh ahcun Laimi a kan cawmtu le Rangoon le Mandalay ah inn tha le lo tha a kan ngeih tertu le khua a kan sak tertu, ramdang chin ah kan lanh khawhnak innka zong asi i chim cawk ding an si lo.  Cun Malaysia tal a phan ballomi hi cu chan ti luan a dawi kho lo mi kan lo cang.

Malaysia a phanmi Laimi kan nuncan le kan har ning hi pumpak i a phan bal ve lo mi nih cun ka i chimh chin lawng cun zumh awk a har ngai mi thil asi. A ram va phak hnu i nuncan le khuasak a har lawng si lo in, tanglei lam i passport lo i kal hrim hrim hi a har tuk hringhran. Keimah pumpak zong 2003 ah Bangkok ah visa tha te i ka lak hnuah Bus in tanglei kal ah ka rak i thawh i Thailand le Malaysia ramri in an rak ka khirh bak i Bangkok ah ka kir than i vanlawngin ka zuang than.  Vawleicung ka khual tlawnnak vialte lakah a har bik ah ka ruah. Visa he hmanh ka luh khawh lonak lam cun kan Laimi, nu he pa he, tar he no he, heh tiah ah lolam kal i an kal khawhmi hmanh hi khuaruahhar taktak asi. A chung va phak hnu zong ah zeitikdah Palik nih an kan tlaih lai, zeitikahdah opersi nih an kan tlaih lai, zeitikdah mi tha lo nih phaisa an kan chuh lai tiin thinphan zungzal i khuasak lio ah, thih-dar kan tum lengmang mi thei lo in khualei ummi chungkhat nih phaisa cah nih asi hoi. Malaysia Laimi har ning hi theih ahcun Inn lei zong nih phaisa a cah ngam kan um rua hnga lo dah.

Cu bantuk i kan nihnak le kan tahnak, kan i siknak le kan i dawtnak, kan i thennak le kan i fawnhnak le Malaysia i kan teminnak vialte Seihnam nih cauk i a kan tial piak mi nih hin kan techin-fapar tiangin Laimi nih hmailei i kar kan hlannak ah fim a kan chimtu le a kan cawnpiaktu robia cauk ah cang hram seh law, kan harnak chung hin Pathian kan naih chin khawhnak hnga lam hmuhsaktu si hram seh ti hi ka saduhthah le thlacamnak asi.

Van Thawng Lian
USA